الاستعدادات ما قبل المقابلة الشخصية

* لازم نعرف مادام طلبو منك مقابلة شخصية بعد بحثك عن وظائف متاحة ,يبقى هما شايفين انك من المناسبين لهذه الوظيفة..

ودا معناه انك لازم تطمن نفسك وتبقى كمان واثق كدا من نفسك ومش خايف ومتوتر..واوعى ترتبك !!

أولا : طبعا أـكيد عرفت اسم الشركة اللي اتصلت بيك أو بعتتلك للمقابلة الشخصية, ادخل على النت على طول واعمل بحث عن الشركة دي ولو ليها موقع زوره وجمع معلومات عنها  على قد ما تقدر زي (ايه مجال تخصصها,موجودة فين, مين هو صاحبها, ليها فروع ولا لأو ليها كام فرع, ايه هي اهدافها , متى انشأت , فكرها ايه ؟؟وخلى بالك من فكر المنظمة واحترمه حتى لو  مختلف  معاه ....فلو رايح وزارة الاوقاف بيبقى ليها فكر ..غير لو رايح فندق في شرم الشيخ اكيد هيبقا ليه فكر مختلف خالص,ايه هي منتجاتها, وياريت لو تعرف اسماء  اللي حيعملو معاك المقابلةومعلومات من هذا القبيل........الخ ,  دا حيعطي انطباع جيد عنك ,ومدى اهتمامك بهذه الشركة واصرارك للالتحاق بيها, وستطيل فترة المقابلة بينك وبين من يعمل معك المقابلة طبعا هذه الاطالة داخل الموضوع  ليست كلام على الفاضي ,وهذا سوف يقوي العلاقة مع الشخص اللذي تعمل معه المقابلة وسيزيد من ثقتك بنفسك .

       وفي حدود مجال تخصصك ,ايه اللي ممكن تقترحه للارتقاء بمستوى الشركة أة المؤسسة اللي انت رايحلها, اوايه اللي انت ممكن تقدمه للشركة من خبراتك او مؤهلاتك!!
 وبكررها أوعى تتوتر او تفقد الثقة بنفسك أو تخاف !! الشخص اللي حيعمل المقابلة معاك مش ضدك ولا حتى حياكلك لانه عايزومحتاج حد يشغله فعلا عشان كدا نزل اعلان عن وظائف متاحة لديه اللي حضرتك اتقدمت ليها.

ثانيا :في ابحاث بتقول ان الراجل اللي بيعملك المقابلة بيقرر توظيفك من عدمه خلال أول 4 ثواني من اللقاء ودا دليل على ان قرار تعيينك مش قرار عقلاني انما من خلال الانطباع الأول وهذا يعني الاهتمام بالمظهر الخارجي أو العام.

    اختار الملابس المناسبة ,بحيث تكون بسيطة ، وابتعد عن التكلّف والإسراف الزائد

 وحافظ على الأناقة عموماً يعني لازم ترتدي ثياباً أفضل قليلاً من تلك التي تستخدمها يومياً مش لازم جديدة بس المهم نظيفة ومرتبة
 بالنسبة للشباب  يرتدون بدل سوداء أو كحلي أو رصاصي

 بالنسبة للبنات  بلاش اللبس المبهرج والميكاب الكتير كل ماكاب اللبس بسيط وشيك كل ماكان أحسن

الاكسيسوريز للبنات او الولاد المفروض ما يزيدوش عن سبعة اكسيسوري ..مع العلم انو القلم اكسيسورى ..والنضارة بردو .والبتاع اللى بيتحط ف الكارفات بتاع البدل اكسيسورى ..والساعة كمان ..والدبله . عايزها.ودبابيس الطرحة او توك الشعر ..كل دا اكسيسورى ..البس الاكسيسورى اللى انت عايزو بس المهم لما تعدهم ما يبقوش اكتر من سبعه

والمظهر العام للشخص لا يعتمد فقط على ما يرتديه , فالنظافة ، وتمشيط الشعر ، وتقليم أظافر اليدين لا تقل أهمية عن كل ما سبق ....إن المظهر العـام يلعب دورا كبيراً فـي التأثير علـى الشخص الـذي يُجري لك المقابلة .

ثالثا : اجمع نسخاً نظيفةً من الأوراق المطلوبة لهذه الوظيفة مثل : الشهادات العلمية ، وشهادات الخبرة ، والسيرة الذاتية ، وخذ أكثرمن نسخة من هذه الأوراق .

رابعا :خليك  مستعداً لتقديم الشرح عن مؤهلاتِك للعمل، والأجوبةِ عن الأسئلة التقليدية، واتدرب على  تطبيق ذلك مسبقاً من خلال تمثيل  الأدوار مع صديق لك ، أو حتى  أمام المرآة في البيت .

خامسا : رتِّب أفكارَك وتساؤلاتك جيداً قبل الذهاب للمقابلة ,حدد الأسئلة التي تريـد طرحَها في أثناء المقابلة ( طبيعة العمل ، ساعات العمل ، الراتب ، الحوافز …. )انا رأيي بلاش السؤال عن المرتب دلوقتي ولو عايز تسأله ضروري خليه اخر سؤال .

سادسا : لازم تجيد الإنصات وألا تقاطع الشخص اللي امامك حتى لو اعترض على بعض ماتقوله وفي حال اختلاف وجهات النظر حول موضوع ما لاتسعى لإثبات وجهة نظرك بجميع الوسائل , وكأنك في مناظرة , وعلك  إبداء رأيك بلباقة ثم تحاولة الانتقال إلى موضوع آخر (خليك مرن) . وكثيراً من المقابلات الشخصية لم تُثمِر فرصةَ العمل المرجوة , لأن المتقدم ترك الانطباع بأنه عنيد أو شديد التشبث برأيه  وخليك بشوش دائما .

سابعا : نام نام كويس ليلة المقابلة عشان تبقى مركز وحتى لا تتثائب (حيبقى شكلك وحش وقتهاوكسلان مش نشيط )

ثامنا : حاول توصل قبل ميعاد المقابلة ولو حتى بربع ساعة عشان تزيح التوتر اللي انت فيه وتوضحلهم انك منضبط في مواعيدك
     وابقى  خد معاك نوته صغيره خالص وقلم طبعا ..عشان لو عوزت تكتب اى  حاجه  .

 وفي النهاية لازم تبقى مصر انك حتنجح في المقابلة وتشجع نفسك دائما بالايجابية وتوكل على الله فهو حسبك .